يا من شغلني في كلامه لين ضعت بأوله
والتالي أقسى لو عرفني أو عرف صدق الجواب
غاصت حروفك في حشى شاعر خذاها أمثله
بارت طريقه من لقى وعيه لريعان الشباب
كم قلت في طعن الصحاب وقلت في جور الوله
كم قلت في ظلم المسافة للذي عمره غياب
كانك حياتك ما لها الاٌ لون واحد تجهله
صدٌق حياتي زهوة ألوانٍ على سحنة عذاب
مات الطموح بداخل اللي صاغ عمره أسئله
من وين أو كيف ومتى سارت سنيني للاياب
أحيا حياتي حلم وردي شال فكري وأرسله
وأبدأ سباتي لين ذاب الحلم وألفاني سراب
وأغفى على نجمات ليلٍ عاف طيفي مجمله
وأصحى على غفلات نورٍ تاه في طي السحاب
أحيان أحس اني قطعت بوصل قلبي وأوصله
وأحيان أحس الوصل طفلٍ عاش في حجر الذهاب
وأوقات أحس اني كرهت انسان فيني وأقتله
وأوقات أحس العمر دونه ذاب في ليلي وشاب
بين الحقيقة والخيال اللي رفضت أتخيٌله
ضاعت حروفي بين وقت الشوق والغيب المهاب
احبس دموعك وابتسم داري ضياعك وأغفله
حطٌم وضوح العمر حولك واختفي خلف الضباب
لو جفٌت الدمعة على بعض الجروح المهمله
ما غابت البسمة عن شفاه المواليف القراب
هذي حياتي ارسم الدمعة عبيرٍ وأرسله
مدري شعوري يحضنه عالي السحايب أو تراب
وأسقيه مني عاطفه تغمر خفوقي بأكمله
حتى كستني بالثياب اللي أسمٌيها ثياب
ما هي حكاية تايهة تنطر ستار أسدله
حسي جذبني والخواطر أقبلت من كل باب
كل الحكاية بيت قيلٍ له بأعماقي صله
يحمل معاني ضاق في تبيانها فحوى كتاب
طرد السراب لمن يحسبه ماء ما هي مشكله
المشكله طرد السراب لمن يعرف انه سراب
